Day 9 : 泰國倒數

話咁快呢個旅程已經黎到尾聲,要收拾心情聽朝一早坐飛機返香港喇,起呢10日泰國,我地去過唔同既地方,食左好多唔同既美食,亦都可以同老公兩位泰國同事一齊食飯,對於我黎講都係好難忘,可以同一些同自己文化背景唔同,國藉唔同既人走埋一齊,可以從傾計當中去認識呢個國家,未嘗都唔係一件好事,2006年好快就過去,回望呢一年都過得有開心,亦有唔開心既時侯,開心既係今年我同老公可以起兒童班服侍,從兒童班裡去學耐性(對住小朋友),怎樣去同小朋友相處,其實都係一個學問,黎緊既時間仍要繼續去學,另外一方面,開心既係見到神大大去祝福我地既財政,今年我同老公都分別加左人工,而供樓亦都可以減到息,對於我地黎講,真係好值得去感激神,因為呢個係一個出乎意料之外既祝福,感激神!!

唔開心既事,都會令我想起Matthew既離開,有些地方我仍然唔係好明白,今年年頭有幸可以同佢在一個查經班,而我地亦都一齊去合作帶領Level 2,我同老公亦曾邀請過佢地黎我屋企食飯spend time,好開心既片段常常起我腦海中出現,雖然Matthew離開左我地都有2個幾月,但佢果份有創意,付出,簡單既心,喜樂,一定會常常在我地心裡,但願佢起天上面,同神快快樂樂地一起,我深信我地必定會再見!!

今晚收到消息,曼谷有炸彈爆炸,為左安全起見,我同老公食完飯就返左酒店,希望新既一年,樣樣事情都會順順利利,婚姻美滿,屬靈指數越黎越高...

Day 8 : 翟道翟 & Central World

終於等到今日去翟道翟喇,黎親泰國一定係必會去既地方,呢個market平時只係星期六,日至開,地方好大,鋪頭多到相等於百幾條女人街,有好多不同種類既野買,價錢仲要係好平,今日老公個泰國同事和我地一齊去,因為佢可以用泰文幫我地講價,而且今日收獲都唔錯,老公買左一對鞋,兩條牛仔褲,一些裝飾品,今次黎翟道翟無上年黎咁熱,因為佢每一個鋪位都係用鐵皮黎搭建既,加上上年7月黎泰國時天氣酷熱,入到去好焗,行唔夠兩個section,整個人都出哂汗,但今次就好唔同,雖然泰國一年四季都係夏天,但12月既天氣出奇地係涼快,好舒服,所以今日起裡面都行左五個幾鐘,而且一d都唔覺得辛苦呀...

晚餐(泰國菜)@Central World

Day 7 : 新大黑@Inter-Continental Hotel & MBK Centre

泰國之旅已經黎到第8日喇,呢兩日開始唔知去邊度行好,旅遊書所介紹既地方,大部份都已經去過,由於老公晏晝要留起酒店度做野,所以我地多數出去食個lunch就返酒店,等到夜晚至出去行,今日同老公去左Inter-Continental Hotel裡面既"新大黑"度食日本野(哈哈,無錯,又係日本野),之前聽同事介紹呢間餐廳,話呢度既日本菜係好正宗,而且價錢又唔貴,餐廳既裝修又靚,所以同老公決定今日黎試試,我地叫左一客壽司定食+天婦羅定食,味道果然唔錯,食到好飽,好開心,食飽飽之後,老公就要返酒店做野喇,返到酒店,我就上網睇下碟,跟住我就瞓左一陣,醒既時候都已經夜晚7:30,我地就拿拿臨換衫去搵野食,老公突然好想打邊爐,於是我地就去左MBK Centre裡面食飯,第二次起泰國打邊爐,感覺同起香港差唔多,唯一分別係食物種類比香港少,但價錢就平好多,都幾好食架,今晚呢餐飯都算特別...唔錯!!!

Day 6 : Underground Train Zone Market @ Kamphaeng Phet

今日睇旅遊書介紹呢個market,書裡面影左好多鋪頭,感覺上有d似夜市,有好多不同既野買,所以同老公決定今日去逛逛啦,坐左5個BTS去左Mo Chit站再轉一個MRT(即係地鐵)站就到喇,個market好近MRT,一去到發覺好多鋪頭都無開.有些什至仲裝修緊,同書裡面所介紹既簡直係兩回事,有些被騙既感覺,一場黎到點都要行下既,行行下無意中見到有間幾靚既餐廳,餐廳裡面既裝飾同佈置,都好有懷舊feel,於是我地就去左呢間餐廳到食個tea啦,我地叫左一杯fruit punch,一碗冬陰公,一杯雪糕,味道都唔錯,由其個冬陰公,真係好好味喎,酸得黎又唔係太辣,好正,食完就諗住坐BTS去MBK Centre食個旅遊書介紹既多士,但望下隻錶時已經5:00,我地今晚仲約左老公果兩個泰國同事一齊食泰國菜,為免今晚食唔落飯,所以決定都係唔去而返左酒店,稍作休息喇..

晏晝我地食既tea:

今日既晚飯(泰國菜):

Day 5 : Siam City Hotel, Central World & Suan Lum Night Bazzar

今日起泰國已經係第五日喇,今早起來去左酒店附近食好好味既燒肉飯,食完後就去左自己住既酒店參觀,環境一般啦,比起上次黎住果間真係遜色左少少,但呢度勝在交通方便,去機場只需30分鐘,而酒店附近又有BTS站,行過去都係只需5分鐘,非常方便,晏晝老公要起酒店做野,所以我地夜晚至會出去,但未plan去邊度食飯,但食完飯我地會去多一次夜市行街,掃下貨咁啦,哈哈....

晚飯+夜市:

我地既戰利品:

回程時發生左一些小插曲,是原我地行完夜市想坐的士返酒店時,問了幾架的士,有些話唔識去,有些就開天殺價,最後我地搵到一架的士,佢係用咪錶收錢既,上車前我地將個酒店地址比左個的士司機睇,問佢識唔識去呢間酒店,佢搭我地ok,咁我地就上車,但開車無耐,發現個司機個樣開始有些古怪,再問佢係咪識路時,佢竟然話比我地知係唔識路,之後我地起返夜市裡面落車,再搵第二架的士坐,搵左一陣,老公發現唔見左個電話,先醒起個電話留低起架的士度,但架的士已經唔知去左邊,後尾我地嘗試打返去個電話度,希望會有人執到,感激神,一打去時係有個香港女仔聽,佢仲問我地係唔係留低左部電話起的士度,因為佢咁岩上左呢架的士,但後尾佢因為個的士司機唔識路,佢地起返夜市度落車,太好喇,後尾我地起返夜市度拎返個電話,失而復得既感覺真係好開心,感激神比我地搵返個電話之餘,而執到果個人係香港人...

Day 4 : Sala Daeng & Siam

黎到泰國已經第四日喇,老公今日晏晝要起酒店做野,所以我都係留起酒店上網同睇碟,今晚無乜特別地方去過,原先諗住去Sala Daeng度食飯,但去到發覺無乜野行之餘,連食飯既餐廳都唔多,最後我地去返早兩日去既Siam區食飯,但今次我地唔係再去食日本野喇,而係改去食西餐,間餐廳起Siam Discovery Centre裡面,名叫"Sizzler",上年黎泰國時都食過,食物都唔錯,有自助沙律吧同飲品任飲,今晚我地叫左兩份set dinner,埋單係港幣122蚊,但已經食到好飽,食完之後去左附近既商場行下,就回酒店..

聽日同老公決定去多一次"Suan Lumn Night Bazzar"度行街買野,好開心...果度買野真係好平,又可以講價,係一個必去既地方,哈哈..

Day 3 : China Town食魚翅 & Suan Lum Night Bazaar

唔覺唔覺起泰國已經第三日,今日老公都要起酒店做野,而我就好free咁起房度睇"一公升眼淚",今日既行程都好簡單,晏晝去左酒店附近食日本野(無錯,又係日本野,因為我地兩個鐘意食,又平又好味),食完之後,老公就要返酒店做野,我當然起房休息一下同煲下碟啦(好彩起香港帶左d碟黎唧),夜晚我地就約左老公個泰國同事Prasit一齊食飯,我地去左China Town度食魚翅,起泰國食翅真係好平,一煲都係港幣60蚊,有見及此,我地每人叫了一煲翅再加四碟小菜,埋單只係港幣300蚊,我地一直諗住今晚餐飯係請Prasit食,但埋單時佢堅持要比錢,我地阻止好耐都唔成功,因為今晚餐飯對於佢黎講係貴,攪到我地非常唔好意思,所以我同老公決定再搵一日請返佢食飯,以示感激,食完飯後,我地就坐的士去左曼谷好出名既夜市"Suan Lum Night Bazaar"行街,今次再行比起上年黎時舒服得多,因為呢幾日泰國都唔係好熱,夜晚仲涼涼地,感覺舒服好多,今晚我同老公都有收獲,我同佢都買左波鞋,兩件衫同一些擺設,價錢又平,好彩Prasit同我地一齊行,佢可以用泰文幫我地講價,買野都買得放心,起碼我地唔會比人呃啦,哈哈...

Day 2 : Siam Paragon & Bioyork Sky Hotel

今日係旅程既第二日,今早起身QT後,就同老公去左全東南亞最大既商場--Siam Paragon,由酒店坐兩個站火車就可以去到,商場係駁住火車站,非常方便,呢個商場真係好大,感覺好似香港既Time Square,買既野都係名牌,但呢度有一個好大既Food Court,有些枱係對住個大魚缸食飯,好靚架,行左一陣,我地就去左隔離既Siam Centre裡面食日本野,食物唔算貴,我地叫左兩個定食都係港幣88蚊,但味道係好好食,食飽飽再行一陣就返酒店休息...

夜晚我地去左Bioyork Sky Hotel食Buffet,價錢係港幣100左右,食物種類唔算好多,不過環境一流,因為間餐廳起82樓,一路食一路可以飽覽曼谷既夜景,真係好靚,起香港都未必可以用一個咁平既價錢起咁靚既環境底下食晚飯,真係好開心...

今日既行程真係好寫意,行下街,食下飯,咁就過左一日既假期,都好滿足..

Day 1 : 到左泰國喇

搭左兩個幾鐘頭飛機,終於到左泰國喇,感激Jason & Karen黎送我機,當我去到泰國時已經九點幾喇(泰國時間,比香港慢一個鐘),老公起機場等左我兩個幾鐘,一出境見到佢,真係好開心,由機場坐的士去酒店,都只不過係港幣四十幾蚊,坐左半個鐘度,去到酒店,休息一會,我地就出左去搵野食,坐左一個火車站,去食街邊既燒肉飯,真係好好味喎,舊燒肉好脆,我地兩個叫左一個燒肉飯,燒肉米粉,一支百事,都只係港幣13蚊,真係好抵呀,由於附近無乜野行,加上我有些攰,所以我地就返左酒店,搭火車都係港幣2蚊,超抵呀....

Merry Christmas

今年我同老公都唔會起香港過聖誕,鄭Ming同華哥仔起樹祝大家Merry Christmas & Happy New Year,希望大家出年事事順利,屬靈指數越黎越高,YEAH.....

老公與泰國同事

嘻嘻,琴日收到老公send黎既e-mail,有佢同佢個泰國同事既合照,佢個同事瘦左好多,比起我上年見佢既時候,真係瘦左一個碼呀,哈哈...

老公起泰國買既戰利品

唔覺唔覺老公去左泰國做野都有幾日既時間,很掛念他,好彩依家科技發達,我可以同老公玩msn同skype網上傾計,早兩日收到老公既e-mail,佢話佢泰國同事帶佢去左一個地方買好平既波衫,都幾靚架,價錢仲好平,只係HK$100一件,當然呢d衫只不過係A貨,但望落去都唔差架..

好想快d到星期六啦,我就可以飛過去泰國同老公一齊喇...

茵姐, 生日快樂

今日係茵姐既生日,思佩,Yvonne,Fanny黎左我屋企打邊爐,順便同茵姐慶祝生日,睇下電視,講下笑,好開心既一晚...

在此,再祝茵姐生日快樂,事事順利,婚姻美滿...

聖誕佈置

為左迎接黎緊既聖誕節,今晚同老公一齊去佈置屋企,拎返上年買既光纖聖誕樹,一些簡單既裝飾,屋企立時變得好有聖誕氣氛呀...

一休和尚

早排見到Andy相機裡面有諾諾呢張相,非常可愛,睇完之後真係好鐘意,多謝Andy e-mail左呢張相比我,你睇下諾諾笑得幾開心,望落去好似以前細過好鐘意睇既卡通片"一休和尚",哈哈,見諾諾笑得咁開懷,真係不得不放落自己個blog度,等我一開blog時見到,我就會好開心架喇,呵呵

Bangkok, We are coming......

今日收到老公既電話,下星期五佢要去泰國公幹喇,每次佢出trip,我都會跟埋去,所以今次都唔例外,我希望可以book到機票起24/12飛去泰國meet老公啦,回程就1/1至返,今年我實行要過一個熱辣辣既聖誕節呀...