丁丁與焯楠仔

過去既星期日,感激小燕同阿偉邀請我地一家三口去佢地屋企食飯,有好開心既傾計時間,焯楠仔仲同丁丁一齊起網床合照潻,感覺佢地好似兩小無猜咁,好可愛呀!!

好興奮, 焯楠仔11個月大喇

今日係焯楠仔11個月大既日子,仲有一個月,焯楠仔就一歲生日喇,好開心,時間過得好快,而焯楠仔亦都有以下既成長:

奶: 3餐奶(6至7安),至今仍然食緊1號仔,因為焯楠仔食2號會敏感呀
粥: 瘦肉,白菜仔,波菜,南瓜,節瓜,菜心,薯仔,甘荀,栗米,遲少少會嘗試比焯楠仔食魚(又係之前敏感)
米糊: 1餐healthy time米糊
生果: 蘋果,牛奶蕉,梨
尿片: Fitti大碼
體重: 21磅
牙仔: 上排牙肉有少少白色,而下面就未見有起色
如廁: 可以用potty開大大
行為: 坐得好穩,唔抉野企起身三秒,可以扶住梳化行,爬得好快,識得"拜拜","hi-five","拍手",錫錫公仔
認知: 已經識得分辨邊個係工人姨姨,爸爸,媽媽
聲音: 經常發出好多太空話,亦都經常聽到叫"ba..ba..","ma..ma"....,"阿dur dur"....
性格: 膽小,見到陌生人或人多既地方,就會好呆,唔敢郁,什至喊,叫佢唔好掂危險既野,就會發脾氣,起度喊

好期待繼續發掘焯楠仔一些既成長,不過最緊要都係想見到焯楠仔身體健康呀!!

焯楠仔病了

琴日晏晝收到工人既來電,話焯楠仔發燒呀,探耳兩邊都係100.3度,唔算高燒,於是我叫工人先餵焯楠仔食退燒藥水,等我返黎帶焯楠仔去睇醫生,去到仁安醫院門診,幸好唔係太多人,等左一陣就可以見醫生,焯楠仔好乖喎,坐定定比醫生檢查,全程無摟計,好合作,經醫生檢查,發現焯楠仔喉嚨有少少紅,應該係感冒,唔係咩大問題,不過眼見焯楠仔同平時一樣玩得,食得同訓得,所以我都不太擔心,琴晚同今朝再餵焯楠仔食藥水,佢已經無再發燒喇,而鼻水都收左,可能琴日焯楠仔唔舒服既關係,佢琴晚好早訓,同埋可以一覺訓天光呀,希望焯楠仔快些康復啦!

另外,我知道柔柔之前都病左,希望佢都可以快些康復!!

BT迎月Party

過去既星期六,我地查經班去左Wing Yan & Wallace屋企有我地既迎月Party,當中非常感激Wing Yan & Wallace為我地預備食物,遊戲,佈置,同埋一個好大既吹氣泳池比我地一班既bb起裡面玩,等我地可以安心去享用食物,謝謝你地!!

行超市

今晚我地一家三口去左新城市食飯,順便帶焯楠仔去行city super,等焯楠仔可以接觸唔同既事物,焯楠仔仲眼定定望住蟹蟹,又用手去摸蜜瓜同香蕉,可以行街之餘亦可教導焯楠,真係一舉兩得呀!!

釣魚樂

今日約左中醫偉,詠恩同Wallace出海釣魚,好開心,不過可惜小妹中途暈船浪,又暈又嘔,要中醫偉拖返我地隻船埋岸,最後自己決定返屋企休息,剩低老公同佢地繼續出海,希望下次狀態好時,可以再次相約一齊出海釣魚就好喇!!

焯楠終於肯食米糊喇

早排起個blog度提到焯楠厭奶之後,我同老公決定餵焯楠食多一餐solid food,就係食米糊喇,我記得焯楠五個半月既時候,我就開始嘗試餵焯楠食米糊,經過兩個星期時間,焯楠唔係咁鐘意食,所以餵食米糊既計劃就擱置了,如是者最近焯楠唔鐘意飲奶,令到我地好擔心,因為驚焯楠唔夠營養,所以我地再開始嘗試餵焯楠食米糊,結果係焯楠鐘意食喎,到目前為止佢可以食一餐米糊喇,咁我地都安樂哂!

焯楠仔飲食時間表:

7:00am 飲奶(5至6安)
11:00am 一碗粥
3:00pm 飲奶(5至6安)
6:30pm 一碗米糊
9:45pm 飲奶(5至6安)

我地仲將焯楠沖涼時間由晏晝改為夜晚,目的希望焯楠可以relax咁去訓覺,效果唔錯,焯楠既睡眠質素都大大改善,以前焯楠一個星期會醒幾晚,依家少左好多喇,大部份時間都可以一覺訓天光,只有間中失手,但對於我地黎講,已經好好架喇!!