一歲針後既反應

剛過去既星期一(27/10)帶焯楠去健康院打一歲針,殊不知焯楠琴晚開始嘔,由初初唔係嘔好多到今日晏晝,焯楠可以將成支奶奶嘔返哂出黎,所以決定放工帶焯楠去睇醫生,去到仁安醫院做評估時,發現焯楠仔開始發燒,之後去見醫生,醫生話這些都係打針後既反應,感覺好像感冒一般,醫生建議焯楠少食多餐,飲奶嘔既話就同佢食米糊或粥仔,不過要確保焯楠仔有足夠既水份,即係要飲多些水,之前去健康院打既針,焯楠都只係發燒,絕對無嘔奶,估唔到一歲針既威力係咁大,見佢除左唔多願意飲奶之外,幸好佢都好精神,繼續起屋企周圍爬同行,希望焯楠仔快些康復啦!!

BB行到好多步喇

焯楠仔依家開始學行,由初初果一,兩步,都依家可以行到好多步喇,叻叻呀!!

一歲針

闊別半年既健康院今日再次踏足喇,皆因今日要帶焯楠仔返健康院打一歲針,我地仲見到丁丁妹妹潻,一歲既焯楠有以下既成長:

體重: 9.46kg = 20.8磅(比之前好似輕左),不過姑娘話焯楠重得好好
小肌肉發展: 姑娘比左兩粒星星餅給焯楠,目的係想睇下焯楠識唔識用手指公去拎,開頭焯楠望左姑娘一陣,好似唔敢拎,最後佢都可以用左手同右手既手指去拎餅,叻叻呀!
放積木: 姑娘比左兩個積木給焯楠,想睇下佢識唔識放入個盒度,最後當然佢係識啦,哈哈,又比個叻字你先

之後,姑娘都係問返焯楠一些飲食習慣,玩咩玩具呀,識唔識行呀,識唔識講野呀...等等,問完後就等叫名入房打針,老公話焯楠入到去開始掙扎,好似知道自己要打針,打完之後,都喊左起碼超過五分鐘,係焯楠有史以來打完針後喊得最耐既一次,姑娘話一歲針都有副作用:發燒+出疹,不過唔係個個bb都會有既,當然我都希望焯楠仔打完針之後唔會有任何副作用啦!!

冒險樂園

上星期六同諾諾一家去左馬鞍山食泰國菜,之後我地仲去左冒險樂園玩,不過焯楠有些細膽,坐火車同騎木馬都驚驚,唔敢玩,唯有等佢再大些少時再黎過啦!!

Cheuk Nam at Studio

今日帶左焯楠仔去studio影造型照,焯楠仔好合作喎,warm up左一陣,就可以埋位影相喇,成個過程只係用左半個鐘,影好之後,我地可以選出30張相,價錢唔算貴喎,只需$380咋,都ok架!!

Our Dearest Cheuk Nam, Happy Birthday

今日係焯楠仔一歲生日既大日子,對於我地黎講係一個非常特別重要既時間,回想起上年既今日,我正正要入醫院開刀生焯楠仔,仲記得果日好緊張,因為咁大個女都未試過入醫院,無幾耐既時間就聽到焯楠仔既喊聲,之後姑娘仲抱比我地,一齊影左第一張既全家福,時間過得好快,轉眼間焯楠仔已經一歲喇,由初初一個細小既身軀,到今日已經識爬,學行,有自己既脾氣,焯楠仔既黎到,確實帶比我地有好多既歡樂,雖然有時照顧佢既時候,都會有好多炆憎既時間,但我好快已經唔記得喇,好感激神去祝福我地既家庭,比我地有一個咁可愛既焯楠仔,我地希望焯楠仔身體健康,聽教聽話,做一個喜樂同感激既小朋友,祝你生日快樂!!!

焯楠仔學行喇

仲有兩日焯楠仔就一歲生日,依家焯楠仔開始學行,佢可以唔扶野行到幾步,叻叻呀!!

Birthday Party

仲有4日既時間,就係焯楠仔一歲生日,今日晏晝去左大佬新屋同表哥一齊攪生日會,好開心,今次係焯楠仔第二次切蛋糕(第一次係半歲生日時切既),收左唔同既禮物同利是,夜晚仲有我既親戚上黎一同慶祝,仲一齊吃盤菜,過左一個好開心既生日會,爸媽起度祝焯楠仔身體健康,聽教聽話,做一個喜樂同感激既小朋友!

"小小明星"足球隊

上次demographic hc經過佐敦寶靈街,見到有一檔口係買bb波衫,大家都忍唔住買返套波衫比自己既仔女,仲相約左sunday一齊著同埋合照,好得意呀!!

爆喇.....爆喇....

期待已久既牙仔終於出現喇,早早兩個幾星期前,已經發現焯楠仔上面有些少踵,之後就開始見到有一點白色,原來係牙仔呀,到左今日,焯楠仔上面隻門牙仍然出緊,仲未出得哂呀,起呢個時候,焯楠仔下面又開始出牙,一係唔出牙,一出就出幾隻,唔怪之得最近焯楠仔特別摟計啦,簡直起屋企係一個小魔怪呀...

成日都好想影低焯楠仔隻牙牙,但佢完全唔比我地睇,仲要張個口合到實一實,試過等佢訓左擘大佢個口,佢個本能反應將條脷仔卷上,都係唔比我地睇,所以暫時未能影到焯楠仔既出牙照,如果我有機會影到,會再post上blog比大家睇睇!!

重陽假期 : 黃金海岸 & Mega Box

琴日假期我地一家同andy叔叔,cryus叔叔一齊去左黃金海岸玩,焯楠仔第一次行沙灘,佢竟然唔驚,仲夠膽行同玩沙,之後我地仲同andy叔叔去左Mega Box食飯潻,過左一個好開心既假期!!

國慶日 : 大埔海濱公園

今日係國慶假期,我地查經班相約去左大埔一齊飲茶,之後齊齊去左大埔海濱公園影相同踩單車,今日天氣好好,我地三點幾去到公園,唔係好哂,仲有微微既風吹著,好舒服呀!!

焯楠仔上左封面呀

老公起facebook搵到一個website係可以將阿b既相放上去做唔同既background,好攪笑呀!!