五個月大既焯楠

五個月大既焯楠可以教佢做d乜?最近我同老公訓練焯楠學坐同做拜拜既動作,其實呢個拜拜動作,我地兩個都係不斷起焯楠面前,一日做好多次,辛之早幾日焯楠間唔中都可以舉起手手做到拜拜既動作,好開心呀!!

至於今晚,我地就訓練焯楠學坐,其實之前都訓練過,不過焯楠坐得好唔穩陣,成日左搖右擺,但今晚焯楠終於可以坐得耐d喇,希望黎緊既時間會見到焯楠有更加多既成長啦!!

焯楠第一次食米糊

不知不覺焯楠已經5個月大喇,今日係佢人生第一次食米糊,感覺好好喎,佢又肯食,真係好開心喇!!

工人今日到喇

申請左三個月既工人,今晚終於到喇,心情開始緊張,亦都有唔同既憂慮,成日諗唔知個工人品行係點,佢會點樣對待焯楠,會唔會好有愛心,耐性去照顧佢,而且屋企開始多左一個人住,我同老公都要適應,希望我地可以相處到,而工人都可以達到我地既要求啦!

另外,亦都好想多謝andy & alkie,因為佢地將個工人訓開既床轉送左比我地,等我地唔需要額外用錢買,仲有doris email比我個工人守則,好有用呀,等我地可以大概知道點樣set rule比個工人,謝謝你地!!

小可憐

焯楠bb又試病倒了,琴日晏晝五點幾收到阿媽電話,話焯楠有些發燒,於是我地放工後就立即帶焯楠去睇醫生,見到焯楠有好多鼻水同有些少咳,發燒就時退時燒,真令我地擔心,幸好見到焯楠飲奶都ok,同佢玩亦都有反應,會識得同我地笑,希望焯楠快些康復啦!!!

濕疹

焯楠自從兩個月大起就開始出現濕疹,早排天氣凍同乾燥,令到焯楠既濕疹越黎越嚴重,見佢好辛苦,塊面仔紅卜卜,我相信佢會覺得好痕,所以成日都想用隻手去抓,攪到塊面仔損哂同出水,見佢都好炆,又訓得唔好,之前用左好多唔同牌子既cream,都未能令到焯楠既濕疹好轉過來,直至上星期六帶左焯楠去睇皮膚專科,醫生一睇就碓定焯楠面上係患有"小兒濕疹",亦即是"奶癬",情況唔算嚴重,亦都係好普遍既嬰兒皮膚病,經醫生一番解釋之後,原來我地一直以黎用錯cream去幫焯楠搽,我地亦都唔應該經常幫焯楠洗面,咁樣會令到焯楠既皮膚水份流失,所以攪到焯楠既濕疹不斷翻發,所以醫生開左含類回純極低既藥膏,低敏感沖涼液同洗頭水比我地,希望可以幫助焯楠康復,雖然睇醫生用左八百幾蚊,但如果可以令到焯楠既濕疹康復,都值得既!!

焯楠bb,你要快d好返呀,爸媽會為你祈禱架!!!!

焯楠又成長左喇

今早帶焯楠去健康院打針,焯楠已經有16磅3喇,體重,身高同頭圍都正常,姑娘今日仲幫焯楠做視力測試,開頭姑娘拎住一個搖鈴在焯楠面前擺黎擺去,目的係測試焯楠對眼會唔會跟住個搖鈴望,初初焯楠只係望住個姑娘笑,完全無望個搖鈴,後尾姑娘不斷引焯楠注意,佢先至開始跟住個搖鈴望,好好笑!!